Amma lahu luhaan chaman dekhne chalo

Zainab ke baazuo’n mein rasan dekhne chalo
Amma lahu luhaan chaman dekhne chalo

Gathhri mein baandh laaya nishaani main bhai ki
Paamaal laash e Ibn e Hasan dekhne chalo

Ammu na paani chaahiye, bus laut aaiyye
Mushkil mein hain garib e watan dekhne chalo

Kis tarah ye ga’nwaara ho gairat ko bhai ki
Khaimo’n ki paasbaa’n hai bahen dekhne chalo

Bachcho’n ki aas tha wo gharaane ka chaand tha
Oos chaand pe bhi aaya gahen dekhne chalo

Chhey maah ke pisar ko main kis tarah izn doo’n
Maa ka nahi’n samhalta hai man dekhne chalo

Aa mere laal teri balaaein utaar loo’n
Waheshi darinde aur ye bun dekhne chalo

Aaye qaraar kaise laeeno’n mein ghir gaya
Masoom mera tishna-dahan dekhne chalo

Beta Abu Turaab ka be-gor o be-kafan
Udd udd ke khaak banti kafan dekhne chalo

Hote hi shaam qaid mein masoom qaidi ko
Reh rehke yaad aaye watan dekhne chalo

Waada hai Sayyada ka ‘Salim’ bakshwaaegi
Mehshar mein aa’nsuo’n ka chalan dekhne chalo