Aao behen sawaar karao hussain ko

Jab akhri rukhsat ko hussain aaye haram se
sab bibiya'n lipti shahe waala ke kadam se
hazrat ne kaha, qat'e mohabbat karo hum se
jine ke nahi hum ali akbar ke hai ghum se
ek baar phir gale se lagao hussain ko
aao behen sawaar karao hussain ko
aao behen sawaar karao hussain ko..(2)

ek baar phir gale se lagao hussain ko
aao behen sawaar karao hussain ko..(2)

1. Lo aagaya wo waqt ke, jaata hai bewatan
kurta diya tha jo tumhe amma ne aye bahan
usko kafan samajhke pinhao hussain ko
aao behen sawaar karao hussain ko..(2)

2. Aye bibi mere nana ka ammama laaiye
humko abaa e shafa e mehshar pinhaiye
maqtal ko jaa raha hai sajao hussain ko
aao behen sawaar karao hussain ko..(2)

3. Hum aapko samajhte hai zehra ki yaadgar
behna hume chalani hai baba ki zulfiqar
himmat phir ek baar dilao hussain ko
aao behen sawaar karao hussain ko..(2)

4. Ek din mein mere moniso yawar juda hue
abbas na rahe ali akbar juda hue
ab jeeke kya karega batao hussain ko
aao behen sawaar karao hussain ko..(2)

5. Dil mera dooba jaata hai beti ko dekh kar
hum sar katane jaate hai isko nahi khabar
isse na baar baar milao hussain ko
aao behen sawaar karao hussain ko..(2)

6. Darya ki simt dekh kar kisko bulati ho
kyu behna is ghareeb ke dil ko dukhati ho
bhai ke ghum me ab na rulao hussain ko
aao behen sawaar karao hussain ko..(2)

7. Meesam khayam e shah mein mehshar bapa hua
sheh ne raza jo zainab e dilgeer se kaha
phir kya khabar ke dekh na paao hussain ko
aao behen sawaar karao hussain ko..(2)