Aap Ko Dhundti Rehti Hai Nigahen Baba

Aap ko dhundtii rehtii haiN nigaaheN baabaa
Bas ghaRhii bhar me liye saamne aayeN baabaa

Aap bhii dekh ke pehchaan nahiiN paayeNge
Aisii TooTii haiN sakinaa pe balaayeN baabaa

BeTiyaaN baap se maanoos bahoot hotii haiN
Kaise jhelooNgii yatiimii kii sazaayeN baabaa

Jal ke mar jaauNgii is dasht e musiibat meN kahiiN
Mere kurtey meN lagii aag bujhaayeN baabaa

Sar paThaktii hooN meiN zindaan kii divaaroN se
Itnii shiddat se mujhe yaad na aayeN baabaa

Har tamaachey pe sadaa aap ko meiN detii hooN
Mujhko aadaab yatiimii ke sikhaayeN baabaa

Gaud meN phir ali asghar ko nahiiN le saktii
Bhartii rehtii hooN yehii soch ke aaheN baabaa

Laash e shabbeer pe they bain sakeenaa ke nadeem
Apnii betii ko kalejey se lagaayeN baabaa