Ho Kaha Bhai Abbas A.S

--
Thi ye Zainab ki sada ho kaha'n bhai Abbas.
Chhin gai meri rida - ho kaha'n bhai Abbas.

*1*
Jis ko tu kahta tha Aaqa wo kaha'n hai bhai.
Kat gaya us ka gala - ho kaha'n bhai Abbas.

*2*
Tha jo ham shakl e Payambar nawjawa'n Akbar ko.
Neza seene pe laga - ho kaha'n bhai Abbas.

*3*
Tak te hai'n rasta tera ab bhi ye pyaase bachche.
Paani ab leke to aa - ho kaha'n bhai Abbas.

*4*
Durre khaata hai ye beemar bhateeja mera.
Aake ab us ko bacha - ho kaha'n bhai Abbas.

*5*
Mere parde ka muhaafiz kyo'n nahi sunta tu.
Chhin li zaalim ne rida - ho kaha'n bhai Abbas.

*6*
Shaam ki galiyo'n me beparda fira kar ham ko.
Hanste hai'n ahal e jafa - ho kaha'n bhai Abbas.

*7*
Nargh e aada me hu'n aur nahi sar pe chaadar.
Baal hai meri rida - ho kaha'n bhai Abbas.

*8*
Bhai aththara the lekin koi baaqi na raha.
Kis ko ab du'n main sada - ho kaha'n bhai Abbas.

*9*
Laasha Abbas ka tadpa hai taraai pe "Anees".
Jab bhi Zainab ne kaha - ho kaha'n bhai Abbas.