Pidar Ki Laash Se Bachchi Ko Sab Hatate Hai

pidar ki laash se bachchi ko sab hatate hain
aseer ho ke haram soove shaam jaate hain

jo soya karti thi seene pe apne baba ke
osi ko khaak ke bistar pa ab sulate hain

pidar ki laash pe rone wo haaye dete nahi
haan misle fatema (sa) dukhiya ko ab satate hain

jalaya kurta to chheeni hain baaliyan oski
har ek gaam sakina (sa) pa zulm dhate hain

kabhi hain baandhte bachchi ko pushte naaqa par
kabhi sakina (sa) ko naaqe se wo girate hain

kabhi wo maangti pani hai jo sitamgar se
gira ke khaak pe paani wo muskurate hain

tadap ke dhoondne lagti hai wo sar e ghazi (as)
tanmacha jab bhi sitamgar ose lagate hain

wo tooti pasliyan le kar bhala chale kaise
wo ghash se girti hai to zulm os pa dhate hain

safaid baal sakina (sa) ke aur kamar kham hai
ye dekh naize se sarwar (as) lahu bahate hain

sar e hussain (as) pe mu rakh ke sogayi dukhiya
nahi wo uthti hai aabid (as) bahut jagate hain

tamachon se jo sakina (sa) ka karte hain matam
tamasha osko raza ahle shar batate hain