Shah Ast Hussain, Jab Wada E Tifli

jab waada e tifli ko wafaa kar chukey shabbir
sar maarka e karbobalaa kar chukey shabbir
khanjar ke taley shukr e khudaa kar chukey shabbir
ummat ke liye haq se duaa kar chukey shabbir

teeroN ne sameTaa shah e bekas ka musallaa
tharraayii zameeN, kaaNp uthaa arsh e moAllaa

jo kaam thaa bhaai kaa bahen ne wo saNbhaalaa
jalte huwe khaimey se bhatije ko nikaalaa
dam toRh gayaa saamne har god kaa paalaa
lab tak na bar aayaa dil e betaab se naala

elaan kunaa naara e taqbeer thii zainab
haaN naasira e maqsad e shabbir thii zainab

chaadar jo chini saaqi e kausar ko pukaaraa
qaasim ko sadaa dii, Ali Akbar ko pukaaraa
har zulm pe Abbaas e dilaawar ko pukaaraa
jhuley meN lagii aag tau asghar ko pukaaraa
royi kabhi, khaimoN ki kabhi aag bujhaayii
beemaar bhatijey ki kabhi aas baNdhaayii

al kissaa namudaar huyii shaam e gharibaaN
taarikiyoN meN duub gayaa ganj e shaheedaaN
eak adh jaley khaimey meN haram baithey haiN giryaaN
sehme huwe bachhey haiN tau zainab thii pareshaaN

rotii thi koii bibi tau detii thii dilaasey
chuauNk uthhey na masoom, abhii soye haiN pyaasey

phir uthhi baRhey Azm se haider ki dulaarii
eak chub jaley khaimey ki haathoN meN uthaayi
sunsaan bayaabaan pe pehle tau nazar kii
phirne lagii phir khaimoN ke chaugird wo bibi
alllah re himmat, barhii zeeshaan thii zainab
soye huwe bachhoN ki nigehbaan thii zainab

naagaah sawaar eak nazar saamne aayaa
tharraane lagii jaan o dil e faatemaah zahraa
bolii ke khabardaar, wahiiN rok ke ghoRhaa
ro ro ke abhii soye haiN masoom, taras khaa

keh de umar e sa’ad se lillaah ye jaakar
kal din meN ujaale meN hameN looTnaa aakar

zainab ki sadaa sun ke bhii Thehraa na jab sawaar
tab bint e Ali ghaiz meN aage baRhii eak baar
chillaayii ke o baani e bedaad o jafaakaar
suntaa nahiiN tuu, kehtii hooN meiN jo jigar afgaar

anjaam bhii tuu rukne kaa ab jaan le zaalim
beTii hooN Ali ki, mujhe pehchaan le zaalim

ye kehte huwe Daal diyaa haath Anaa par
ab chaahiye kyaa looT liyaa jab ke bharaa ghar
hooN laakh gharibul vatan wa bekas o muztar
majboor samajhna na mujhe phir bhii sitargar
kyaa khauf mujhe, apne iraadoN pe jo tu hai
in baazoo’oN meN faatemaah zahraa kaa lahoo hai

aage jo baRhaa, hogii qayaamat abhii barpaa
fariyaad merii pohchegii taa arsh r moAllaa
aur suu e najaf haath agar maine uthaayaa
aa jaayeNge imdaad ko fauran mere baabaa

Sar tan pe na hogaa jo zaraa be adabi kii
zainab hai meraa naam, nawaasi hooN nabii kii

jab baat sunii betii ki, aswaar pukaaraa
zainab meiN teraa baap hooN, pehchaan khudaaraa
kin aaNkhoN se dekhuN ye jigar soz nazaaraa
tuu dukh sahey aur mujh ko ho aaraam gaNwaaraa

shab bhar meiN tere khaimey kaa darbaan rahuNgaa
taa subha isi dasht meN mehmaan rahuNgaa

dukhiyaarii ne jab ghaur se chehrey pe nazar kii
nazdeek e raqaab aayii, qadam chuum ke bolii
baabaa mere kyoN aan ke pehle na khabar lii
maaloom hai kyaa aap kii aulaad pe guzrii

gham khaane ko ye bekas o naachaar hai baaqi
mardoN meN faqat aabid e biimaar hai baaqii

jab sar mere bhaai ki kaTaa, aap kahaaN they
jab khaatemaa akbar kaa huaa, aap kahaaN they
beshiir ke jab teer lagaa, aap kahaaN they
jab sar se chHini merii ridaa, aap kahaaN they

Dhaaras ke liye beTii ki ab aaye haiN baaba
saaraa meraa ghar looT gayaa ab aaye haiN baaba

jab meiN huyii aawaaraa vatan, aap kahaaN they
looTaa gayaa zehraa kaa chaman aap kahaaN they
TukRhey huaa Abbaas kaa tan, aap kahaaN they
baaNdhii mere aAdaa ne rasan, aap kahaaN they

shabbiir ke jab halq pe shamshiir chalii thii
sach kehtii hooN, meiN aap hii ko dhundh rahii thii

paamaal huaa sheh kaa badan aap na aaYe
paamaal huaa ibn e hasan aap na aaYe
bewaa huyii eak shab ki dulhan aap na aaYe
kyoN leke bahattar kaa kafan aap na aaYe

aa jaate tau iss tarah na taqdeer badaltii
yuN pyaase ke halqoom pe shamshiir na chaltii

zainab se kahaa, haashmi haider ne ye rokar
meiN saaye kii maanind tere saath thaa dilbar
hai pesh e nazar ab bhii qayaamat kaa wo manzar
jis waqt ke chiini gayii sar se tere chaadar

meiN bakshish e ummat kaa sabab dekh rahaa thaa
khaamosh khaRhaa marzii e rab dekh rahaa thaa