Kahaa'n Kahaa'n

Tukdo'n mey batgayaa hai tuu beta kahaa'n kahaa'n
Dhoondeygi Rann mey kaisey tujhey Maa'n kahaa'n kahaa'n


Zulfey sawaartey they rasool e arab terey
Paamaal usko kardiya aadaa kahaa'n kahaa'n


Gash aarahaa hai khoon ki boo Teri soonghkar
Beychain hoon my laal hai mera kahaa'n kahaa'n


Sarr hai kahee'n, kahee'n pey Teri laash hai padii
Jaa jaakey roye Fatema Zehra kahaa'n kahaa'n


Beenaayi jaachuki thi kamar jhukgayi Teri
Is haal mey pisar ko tuu dhoondaa kahaa'n kahaa'n


Laash e jawaa'n pey, zarb pey, qabr e sageer par
Abbas, sheh ney tujhko pukaara kahaa'n kahaa'n


Marqad teraa aye laal banaaungi kis tarah
Laasha padaa hai dasht mey bikhraa kahaa'n kahaa'n


Naizey pey, tasht mey kabhi, sandooq mey kabhi
Ek sarr nabi ke laal ka pahunchaa kahaa'n kahaa'n


Angushtari ki ungliyaa'n zaalim ney kaatkar
Dasht e balaa ki reyt pey pheykaa kahaa'n kahaa'n


Zainab to jaayegi sarr e uryaa'n shaam tak
Naizey pey ab padheyga tu qur'a'n kahaa'n kahaa'n


*"Gaazi"* ye mauzja' hai ke naam e Husain par
Behtaa hai dekh ashko'n ka daryaa kahaa'n kahaa'n